தாமரை பூவில் மகாலட்சுமி வாசம் செய்கிறாள் என்பது மக்களின் நம்பிக்கை. ஆனால் தாமரை விதை பருப்பில் பல சத்துக்கள் இருக்கின்றன என்பது அறிவியல் உண்மை. நமது சித்தர்களின் கூற்றுப்படி, தாமரை விதை தோல்வியாதிகளை குணப்படுத்துகிறது. மேலும், தாது விருத்தியை தருகிறது.

இன்றைய அறிவியல் ஆராய்ச்சிகளின் படி, தாமரை விதை பருப்பில் விட்டமின் பி, நார்ச்சத்து, மற்றும் புரதச்சத்து அதிகமாக இருக்கிறது. புரதசத்து மட்டும் இருந்தால் அது உடலை பெருக்க வைக்கும். நார்ச்சத்து சேர்ந்து இருப்பதால் அந்த பிரச்னை இருக்காது.

காய்ச்சல், தோல் வியாதிகள், தூக்கமின்மை, செரியாமை, வயிற்றுவலி, மற்றும் புற்றுநோய் போன்ற பலவியாதிகளை குணப்படுத்தும் சக்தி இதில் இருப்பதாக நவீன ஆராய்ச்சிகள் சொல்கின்றன. தாமரைக்கு ஆன்மீகத்தில் சிறந்த இடம் கொடுத்த நாடுகள் இந்தியா, சீனா, பண்டைய எகிப்து மட்டும்தான். அதிலும் சீனா மட்டுமே அதற்கு உரிய கவுரவத்தை இன்று வரை கொடுத்துவருகிறது.

சீன நலவாழ்வுத்துறை அமைச்சகம் தாமரை விதைகள் உணவாகவும் மருந்தாகவும் பயன்படுத்தப்படலாம் என்று ஒரு அங்கீகாரம் கொடுத்திருக்கிறது. தன்னுடைய மருத்துவ முறையை, தன்னுடைய மொழியை எதிலும் முன்னிறுத்துவதில் சீனாக்காரன் உலகிற்கே முன்னோடி. யாருக்காகவும் தனது மருத்துவ முறையை விட்டுத்தர மாட்டான். சீனாவில் சீன பாரம்பரிய மருந்துகளே எங்கும் கிடைக்கும்.

தாமரை விதைப் பருப்பில் இருக்கும் ஒரு வேதிப்பொருள், புற்றுநோய் கட்டிகள் உருவாவதை தடுக்க உதவும் Interleukin 10 என்ற ஒரு உயிரணு புரதத்தை தூண்டுகிறது என்று நவீன ஆராய்ச்சிகள் சொல்கின்றன. இதுதவிர, தாமரை விதைகளில் கிருமிநாசினி, குறைந்த ரத்த சர்க்கரை, வைரஸ் எதிர்ப்பு தன்மை, கல்லீரலை பாதுகாக்கும் தன்மை, சிதைந்த புரதங்களை சரி செய்யும் தன்மை போன்றவை இருப்பதாகவும் நவீன ஆராச்சிகள் சொல்கின்றன.

தாமரை விதைகளை பிஞ்சாக இருக்கும் போது பறித்து சட்டியில் போட்டு வறுத்தால் சோளப்பொரி போல வரும். ஏனெனில் அதன் ஓடு அப்போது பட்டாணி தோல் போலவே மென்மையாக இருக்கும். அதே நேரம் தோல் நன்றாக காய்ந்த விதையில் ஓடு மிக கடினமாக இருக்கும். விதையை சுத்தியால் அடித்து உடைத்தால் மட்டுமே உடைக்க முடியும். மேலும் பிஞ்சு விதைகளில் இருந்து எடுக்கப்படும் பொரி நல்ல உணவு. ஆனால் அதில் மருத்துவகுணம் அனைத்தும் இருக்குமா என்பது சந்தேகம் தான்.

(Ref1: https://www.researchgate.net/publication/337856597_A_Review_on_Health_Benefits_of_Lotus_Seeds_Nelumbo_nucifera,
Ref2: https://www.ncbi.nlm.nih.gov/pmc/articles/PMC8269573/ )